Naxçıvan Dövlət Texniki Kolleci ilə Sumqayıt Dövlət Texniki Kolleci arasında birgə əməkdaşlıq barəsində görüş keçirilib

Mayın 13-də Sumqayıt Dövlət Universitetinin nəzdində Sumqayıt Dövlət Texniki Kolleci əməkdaşlarının Naxçıvan Dövlət Texniki Kollecinə səfəri baş tutub.

Səfərin maqsədi STEAM təhsil metodu ilə bağlı təcrübənin bölüşdürülməsi, həmçinin təhsil müəssisələri arasında qarşılıqlı əməkdaşlıq əlaqələrinin yaradılmasından ibarət olub.

Sumqayıt Dövlət Texniki Kollecinin nümayəndə heyətinin tərkibində kollecin direktoru, dosent Mətanət Pirquliyeva ilə yanaşı tədris işləri üzrə direktor müavini Əsəd Qurbanov, “Avtomobil nəqliyyatı və energetika” şöbəsinin müdiri Sevda Musayeva, “Ekologiya və kompüter” şöbəsinin müdiri Samiddin Qasımov və müəllim Hədiyyə Əliyeva iştirak ediblər.

Səfər çərçivəsində Sumqayıt Dövlət Texniki Kollecinin əməkdaşları kollecdə yaradılan STEAM kabinəsi ilə yaxından tanış olmuş, burada həyata keçirilən təhsil metodu haqqında zəruri informasiya ilə təmin olunmuşlar. Həmçinin kollec əməkdaşları Naxçıvan Dövlət Texniki Kollecinin tədris şəraiti və prosesi, ixtisaslar və digər məsələlərlə yerində tanış olmuş, kolleclər arasında gələcək inkişaf perspektivləri barədə məqsədlər müəyyənləşdirilmişdir.

Sumqayıt Dövlət Universitetinin nəzdində Sumqayıt Dövlət Texniki Kollecinin əməkdaşlarının Naxçıvan Dövlət Texniki Kollecinə səfəri çərçivəsində Naxçıvan Muxtar Respublikası Təhsil Nazirliyində görüş keçirilib.

Sumqayıt Dövlət Texniki Kollecinin direktoru, dosent Mətanət Pirquliyevanın başçılıq etdiyi heyət Naxçivan Muxtar Respublikasının təhsil naziri ilə görüşüb.

Nazir görüş iştirakçılarına STEAM təhsil metodunun əhəmiyyəti, onun muxtar respublikada tətbiqi və qazanılan nailiyyətlərdən bəhs etmiş, gələcək məqsədlər haqqında ətraflı məlumat vermişdir.